बाँकेमा एकवर्षमा ६३ सर्पको उद्दार

बाँके । डिभिजन वन कार्यालय बाँकेले गत आर्थिक वर्ष २०८०/८१ मा ९९ वन्यजन्तुको उद्दार गरेको छ ।

एक वर्षको अवधिमा सबैभन्दा धेरै ६३ सर्पको उद्दार गरिएको डिभिजन वन कार्यालय बाँकेका सूचना अधिकारी वीरेन्द्रकुमार रोकाले जानकारी दिए ।

उनका अनुसार एक वर्षको अवधिमा गोहोरो पाँच, अजिङ्गर १३, बाँदर तीन, मगर गोही एक, जरायो एक, चित्तल आठ, निर बिरालो तीन, डगर गिद्ध एक र निलगाई एक उद्धार गरिएको छ ।

डिभिजन वन कार्यालयले अघिल्लो आव वर्ष २०७९/८० भन्दा आव २०८०र ८१ मा ५७ बढी वन्यजन्तुको उद्दार गरेको हो ।

आव २०७९/८० मा ४२ वन्यजन्तुको उद्दार भएको थियो । यसैगरी आव २०७८/७९ मा ३१, आव २०७७÷७८ मा ३४ र आव २०७६÷७७ मा १७ वन्यजन्तुको उद्दार भएको सूचना अधिकारी रोकाले जानकारी दिए ।

गत आवमा वन्यजन्तुबाट भेडाबाख्रा ६९, गाईगोरु/भैंसी नौ, बङ्गुर सात, माछा दुई हजार, हाँस १२ र कुखुरा १० क्षति पुगेको छ । बाँके राष्ट्रिय निकुञ्ज तथा सो को मध्यवर्ती क्षेत्र बाहेक जिल्लाका सम्पूर्ण भू–भाग डिभिजन वन कार्यालयको कार्यक्षेत्रभित्र पर्दछ ।

उक्त क्षेत्रभित्र रहेका राष्ट्रिय वन, सामुदायिक वनको संरक्षण, व्यवस्थापन, सदुपयोग तथा वन्यजन्तुको संरक्षण लगायत स्थानीय जनतालाई निजी वन स्थापना र विकास गर्न सहयोग पुग्ने कार्य गर्दै आएको डिभिजन वन कार्यालय बाँकेका डिभिजनल वन अधिकृत अजितकुमार कर्णले जानकारी दिए । रासस