यातायात कार्यालय सुर्खेतद्वारा २७ करोड बढी राजश्व संकलन

सुर्खेत । यातायात व्यवस्था कार्यालय सुर्खेतले २७ करोड बढी राजश्व संकलन गरेको छ ।

कार्यालयले गएको आर्थिक वर्ष २०८०/०८१ २७ करोड २२ हजार ८ सय ६७ रुपैयाँ विभिन्न शिर्षक मार्फत राजश्व संकलन गरेको हो । यो त्यस अघिल्लो आर्थिक वर्ष २०७९/०८० को तुलनामा १२ दशमलव ०८ प्रतिशतले राजश्व बढी संकलन भएको हो ।

उक्त आवमा २४ करोड ९ लाख २० हजार २ सय ४५ रुपैयाँ राजश्व संकलन भएको थियो । कार्यालयले यातायात क्षेत्रको आम्दानी, चालक अनुमति पत्र, सवारी दर्ता सम्बन्धी दस्तुर, सवारी साधन कर, प्रशासनिक दण्ड जरिवाना, अन्य प्रशासनिक सेवा शीर्षकमा कर संकलन गर्दै आएको छ ।

ती मध्य सबैभन्दा बढी सवारी साधन करबाट राजश्व संकलन गरेको हो । सवारी साधन करबाट २० करोड ८५ लाख ७४ हजार ५ सय ६४ रुपैंयाँ आम्दानी गरेको छ ।

यस्तै चालक अनुमति तथा सवारी दस्तुर शीर्षकबाट ५ करोड १६ लाख ७० हजार २ सय ४० रुपैयाँ, यातायात क्षेत्रको आम्दानी ७७ लाख ९० हजार ९ सय ९० रुपैयाँ, प्रशासनिक दण्ड जरिवाना १८ लाख ५१ हजार ४ सय ५५ रुपैयाँ र बेरुजु असुली १ लाख ३५ हजार ६ सय १८ रुपैयाँ रहेको कार्यालय प्रमुख मदनकुमार गिरीले जानकारी दिए ।

‘यस वर्ष अघिल्लो आर्थिक वर्षको तुलनामा १२ प्रतिशतले बढी राजश्व संकलन भएपनि पर्याप्त होइन,’ उनले भने, ‘कर्णालीको माग र आवश्यकता वमोजिम सवारी दर्ता बढाउने विभिन्न स्किमहरु ल्याउन सके हालको भन्दा दोब्बर बढी कर संकलन गर्न सकिन्छ ।’

उनले यातायात क्षेत्रको अप्रेक्षित राजश्व बृद्धिका लागि कुनै एक पक्षको मात्र सुधार नभई बहुपक्षिय कानूनी तथा प्राविधिक सुधारको खाँचो रहेको औल्याए । उनका अनुसार सडकहरुको स्तरोन्नती, संयुक्त अनुगमन, ट्¥याल सेन्टर निर्माण तथा परीक्षामा खटिने कर्मचारीको सेवा सुविधामा सुधारको तत्काल आवश्यकता छ ।