जेठ २३, वीरगञ्ज। सीमावर्ती भारतीय शहर रक्सौलमा भारतको राष्ट्रिय खाद्य प्रयोगशाला स्थापना भएको छ ।
आइतवार भारतीय स्वास्थ्य एवम् परिवार कल्याणमन्त्री डा. मनसुख मण्डावियाले उक्त प्रयोगशालाको उद्घाटन गरेका छन् । खाद्य प्रयोगशाला उद्घाटनमा नेपालका कृषि तथा पशुपन्छी विकासमन्त्री महिन्द्रराय यादवसमेत सहभागी थिए ।
प्रयोगशाला ‘भारतीय खाद्य सुरक्षा एवम् मानक प्राधिकरण’ (एफएसएसएआई) ले स्थापना गरेको हो । प्रयोगशाला स्थापनासँगै नेपालबाट हुने विभिन्न वस्तुको निकासीअघि भारतले गर्ने गुणस्तर परीक्षण सहज हुने भएको छ । नेपाली निर्यातकर्ताले रक्सौलमा प्रयोगशाला स्थापनाको माग गर्दै आएका थिए ।
नेपालबाट भारत निकासी हुने प्रशोधित तेल, भटमासको अर्धप्रशोधित तेल, खाद्यान्न, छालालगायत वस्तुको परीक्षण सहज हुने वीरगञ्जका निर्यातकर्ता सुरेश रुंगटाले बताए । यसअघि यस्ता वस्तुको नमूना परीक्षणका लागि कोलकाता वा दिल्लीस्थित प्रयोगशालामा पठाउनुपर्ने बाध्यता थियो ।
एफएसएसएआईले यो प्रयोगशाला उच्च प्रविधि र पूर्वाधारयुक्त भएको बताएको छ । रक्सौलमा स्थापना भएको प्रयोगशालाले नेपालको खाद्यान्न र कृषिजन्य उत्पादनको निर्यातमा नमूना परीक्षणमा लाग्ने समयको बचत हुनेछ । यसले नेपाल र भारतबीचको द्विपक्षीय व्यापार अभिवृद्धि हुने अपेक्षा गरिएको छ ।
‘छिमेकी पहिलो’ नीतिअनुरूप नेपालसँग कनेक्टिभिटी, व्यापार तथा सीमा पूर्वाधार सुधार गर्ने अभिप्रायले यो संरचना स्थापना गरिएको एफएसएसएआईले बताएको छ । आर्थिक अभियान
