जेठ २,कोहलपुर।
केएल दुगड गु्रपले नेपालगञ्ज मेडिकल कलेजको शिक्षण अस्पताल कोहलपुरमा भर्ना भएका बिरामी तथा तिनका आफन्तलाई दुई महिनासम्म खान पुग्ने खाद्यान्न उपलब्ध गराउने भएको छ । कोरोना संक्रमित र तिनका कुरुवालाई लक्षित गर्दै स्थानीय समाजसेवीले सञ्चालन गरेको सहुलियत खाना कार्यक्रममा केएल दुगड गु्रपले २ महिनालाई पुग्ने चामल र दाल उपलब्ध गराउने भएको हो । बाँके र आसपासका जिल्लाबाट आएका संक्रमित र तिनका कुरुवा आफन्तलाई खानाको समस्या भएपछि स्थानीय समाजसेवीले सहुलियत मूल्यमा खाना खुवाउने व्यवस्था गरेका छन् । प्रत्येक दिन बिहान दुई सय र बेलुका दुई सय जना संक्रमित तथा तिनका कुरुवालाई खाना खुवाउने लक्ष्यका साथ सहुलियत खाना कार्यक्रम सञ्चालनमा ल्याइएको सञ्चालकमध्येका अशोक कोइरालाले बताए । सहुलियत खाना कार्यक्रममा प्रतिछाक खाना ३० रुपैयाँमा उपलब्ध हुने र संक्रमितका लागि हरेक दिन अण्डाको पनि व्यवस्था गरिएको छ । कार्यक्रममा दुई महिनालाई आवश्यक पर्ने खाद्यान्न केएल दुगड समूहले सहयोग गरेको छ भने अन्य आवश्यक सामग्री नेपालगन्ज स्थित अन्य उद्योगी व्यवसायीले सहयोग गरेका छन् । संक्रमित र तिनका कुरुवाले भोग्नुपरेको समस्यालाई लक्षित गरेर सामाजिक उत्तरदायित्वअन्तर्गत दुई महिनालाई आवश्यक चामल र दाल उपलब्ध गराइएको केएल दुगड गु्रपका प्रबन्धक प्रदीप छाजेडले बताए ।(आर्थिक अभियान)
