युएईले २ सय ६७ नेपाली कैदीलाई दियो आममाफी
काठमाडौं । संयुक्त अरब इमिरेट्स (यूएई) सरकारले ५४औं राष्ट्रिय दिवस (ईद अल एतिहाद) का अवसरमा २ सय ६७ जना नेपाली कैदीलाई आममाफी दिएको छ ।
ईद अल एतिहादको अवसरमा नेपाली कैदीलाई उदारतापूर्वक प्रदान गरिएको आममाफीप्रति नेपाल सरकारले संयुक्त अरब इमिरेट्स सरकारप्रति कृतज्ञता व्यक्त गरेको हो ।
नेपाल सरकारले यस आममाफीलाई नेपाल र संयुक्त अरब इमिरेट्सबीच विद्यमान द्विपक्षीय सम्बन्धमा रहेको मैत्री, सद्भावना तथा सौहार्दताको प्रतीकका रुपमा लिँदै यूएई सरकारको यस मित्रवत् र मानवीय कदमको आज एक विज्ञप्ति निकालेर सराहना गरेको छ ।
उक्त आममाफीको निर्णय परराष्ट्र मन्त्रालयको निर्देशनअनुसार आबुधाबीस्थित नेपाली दूतावासले पटक पटकको अनुरोधको प्रत्युत्तर स्वरुप मित्रराष्ट्र युएई सरकारले गरेको आममाफीको निर्णय गरेको विज्ञप्तिमा जनाइएको छ ।
माफी पाएका नेपाली नागरिकविरुद्ध अन्य कुनै बाँकी कानुनी मुद्दा वा प्रतिबन्ध नरहेको अवस्थामा युएईको प्रचलित कानुनअनुसार आवश्यक कानुनी प्रक्रिया पूरा गरेपछि स्वदेश फर्कन सक्नेछन् ।