अछाममा हाइस दुर्घटना हुँदा चालक घाइते

पुस २१, अछाम । अछाममा हाइस दुर्घटना हुँदा चालक गम्भीर घाइते भएका छन् ।

बिहीबार बिहान अछामको सदरमुकाम मंगलसेन स्थित जिल्ला कारागार कार्यालय तल अस्पताल जाने बाटो नजिकै दुर्घटना हुँदा गाडी चालक कमलबजार नगरपालिका ५ का अन्दाजी ३० वर्षीय श्याम खत्री गम्भीर घाइते भएका जिल्ला प्रहरी कार्यालय अछामका सूचना अधिकारी प्रहरी निरीक्षक कैलाश सिंह बिस्टले जानकारी दिए ।

कमलबजार नगरपालिका वडा नम्बर ५ का नरेश शाहीको लु २ ख ६४८० नम्बरको हाइस अनियन्त्रित भएर दुर्घटना हुन पुगेको विष्टले बताए । प्रहरी निरीक्षक बिस्टका अनुसार गाडीमा अन्य यात्रु नरहेको पाइएको छ । घाइते भएका चालक खत्रीको जिल्ला अस्पताल अछाममा उपचार भइरहेको छ ।

यता जिल्ला अस्पताल अछामका नर्सिङ निरीक्षक गंगा बुढामगरले घाइतेको जिल्ला अस्पतालमा उपचार भइरहेको छ बताए ।