राप्रपाले स्थापना दिवस मनायो

स्काई न्यूज/ जेठ १५, सुर्खेत ।  राष्ट्रिय प्रजातन्त्र पार्टी सुर्खेतले ३३ औं स्थापना दिवस विविध कार्यक्रम गरि मनाएको छ । सुर्खेतको वीरेन्द्रनगर स्थित पार्टी कार्यालयमा झण्डोतोलन गर्दै नेता, कार्यकर्ता तथा शुभचिन्तक वीच शुभकामना आदान प्रदान गरि दिवस मनाईएको हो ।

स्थापना दिवसको अवसर पारेर गरिएको चियापान कार्यक्रममा पार्टीले पछिल्लो समयमा लिएको संगठन विस्तार गतिलाई अझ तीब्र बनाउनु पर्नेमा सुर्खेतका वरिष्ठ नेता भरत ढकाललगायतका नेता, कार्यकर्ताले जोड दिएका छन् ।

पार्टीका जिल्ला अध्यक्ष कविराम पुरीले गणतन्त्रका नाममा ठूला दलहरुले गरेका अनियमितता थेग्न नसक्ने अवस्थामा पुगेकाले तेस्रो शक्तिको रुपमा राप्रपालाई जनताले खोजिरहेको बताए । उनले मूलुक गणतन्त्रवादीबाट होइन राष्ट्रवादीबाट देश हाँकिन जरुरी रहेको जनताले बुझिसकेको जिकिर गरे ।

देशका धेरै स्थानबाट स्वतन्त्र उम्मेदवारलाई विजय हुनु ठूला दल हौं भनेर दम्भ देखाउनेहरुको असक्षमता भएको उनको भनाइ थियो ।