छायाँनाथ रारामा पहिरोमा परी ८ जनाको मृत्यु

असोज २४, मुगु । मुगु जिल्लाको छायाँनाथ रारा नगरपालिका–११ सालिम गाउँमा पहिरोमा परी ८ जनाको मृत्यु भएको छ । पहिरोमा परी मृत्यु हुनेहरूमा सालिम गाउँकी ६१ वर्षीया हाजिरा भग्री, ३० वर्षीया होइजाली भग्री, १६ वर्षीया सुस्मिता भग्री, ४२ वर्षीय वीरबहादुर ऐडी रहेका छन् । त्यसैगरी उक्त पहिरोमा परी २४ वर्षीय सत्ता सावत, ३२ वर्षीय कृष्ण सावत, १६ वर्षीय चक्रवीर बोहोरा र वडा नं. १३ कि १३ वर्षीय गौकला बोहोराको मृत्यु भएको नगरपालिका–११ की वडाध्यक्ष कुञ्जुमा कुमाइले बताइन् । हाजिरा भग्री र होइजाली भग्री एउटै घरको रहेको उनको भनाइ छ ।
आइतबार मध्यान्ह सालिम गाउँमाथिबाट पहिरो खस्दा उक्त पहिरोमा परी ९ जना बेपत्ता भएको र सोमबार दिउँसो स्थानीय र सुरक्षाकर्मीले पहिरोमा खोज्दा ८ जनाको शव भेटिएको र अझै खोजी कार्य जारी रहेको प्रहरी नायव उपरीक्षक सुवास हमालले जनाए । मृतकको शव जम्मा गर्ने कार्य भइरहेको उनको भनाइ छ । सदरमुकाम गमगढीदेखि २ घण्टामा पुगिने सालिम गाउँमा पहिरोमा परी ९ जना बेपत्ता भएको जानकारी प्राप्त भएपछि जिल्ला बाट प्रहरी, सशस्त्र प्रहरीको टोली घटनास्थलमा पुगेर मृतकको उद्दार गरेको छ ।

पहिरोबाट सालिम गाउँका करिब डेढ दर्जन घर भत्किएको छ । पहिरोबाट विस्थापित परिवारहरूलाई रोवा गाउँस्थित प्रभात माध्यमिक विद्यालयमा सारेर बासको व्यवस्था मिलाइएको वडाध्यक्ष कुमाइले बताइन् ।