सुनको मूल्यमा आज फेरि कीर्तिमान, ९ दिनमा ३ पटक बन्यो रेकर्ड

काठमाडौं । पछिल्ला दिनमा सुनको भाउमा रेकर्ड कायम हुने क्रम जारी छ । पछिल्ला ९ दिन (गत साउन २९ यता) मा मात्रै सुनको भाउमा ३ पटक कीर्तिमान कायम भइसकेको छ ।

गत साउन २९ गते सुनको भाउ तोलाको १ लाख ५० हजार ८०० रुपैयाँ कायम भयो, जुन त्यतिबेलासम्मकै उच्च थियो । त्यसपछि गत आइतवार एकैतिन तोलाको ३ हजार रुपैयाँ बढेर सुनको भाउ १ लाख ५२ हजार ६०० रुपैयाँ कायम भएर नयाँ रेकर्ड बन्यो । सुनको भाउमा रेकर्ड राख्ने क्रम त्यतिमै टुंगिएन । पछिल्लो पटक रेकर्ड कायम भएको चौथो दिन (आज) फेरि नयाँ रेकर्ड कायम भएको छ ।

नेपाल सुनचाँदी व्यवसायी महासंघका अनुसार आज सुनको भाउ तोलाको १ लाख ५३ हजार रुपैयाँ पुगेको छ । अघिल्लो दिन भने सुन तोलाको १ लाख ५२ हजार २०० रुपैयाँमा कारोबार भएको थियो ।

आज चाँदीको भाउ तोलामा १५ रुपैयाँ बढेर १ हजार ८३५ रुपैयाँ कायम भएको छ । अघिल्लो दिन चाँदी तोलाको १ हजार ८२० रुपैयाँमा कारोबार भएको थियो ।