बाघको आक्रमणबाट एक जनाको मृत्यु

नेपालगञ्ज । बाँकेमा बाघको आक्रमणबाट एक जनाको मृत्यु भएको छ । राप्तीसोनारी गाउँपालिका वडा नम्बर ९ ढकेरी नजिक बाघको आक्रमणबाट दार्माकोट सल्यानका ७१ वर्षीय नगेन्द्रप्रसाद शर्माको मृत्यु भएको इलाका प्रहरी कार्यालय कोहलपुरले जनाएको छ । शर्मा ढकेरीमा आफन्तको घरमा बस्दै आएको बताइएको छ । पूर्व पश्चिम राजमार्ग अन्तर्गत ढकेरीस्थित जङ्गलमा आज बिहान साढे ५ बजेतिर शव फेला परेको थियो ।

शर्माको शव ढकेरी र चप्परगौडीबीचको जङ्गलमा फेला परेको इलाका प्रहरी कार्यालय कोहलपुरका प्रहरी निरीक्षक देवराज भट्टराईले जानकारी दिए । शव बाघले खाएको अवस्थामा कोहलपुर र ढकेरीको बीचमा रहेको भालुखोलामा फेला परेको छ । मृतक शर्मा ढकेरीस्थित आफन्तको घरबाट शनिबार बेलुका कोहलपुर जान भनी निस्केको बुझिएको छ । घटनाबारे अनुसन्धान भइरहेको प्रहरीले जनाएको छ ।