नेपाली चलचित्रले कति व्यापार गर्छन् ? अबदेखि मासिक रुपमा ‘बक्स अफिस’ विवरण सार्वजनिक गरिने

बैशाख २, काठमाडौं । नेपाली चलचित्रले गर्ने व्यापारको विषयलाई लिएर निर्माता र नियामकको तथ्यांक बाँझिएपछि अबदेखि मासिक रुपमा बक्स अफिसको विवरण सार्वजनिक हुने भएको छ । यहि वैशाखदेखि नै बक्स अफिस विवरण मासिक रुपमा सार्वजनिक गरिने चलचित्र विकास वोर्डका अध्यक्ष भुवन केसीले बताए ।

नेपालभर चलचित्र प्रदर्शन भएवापत गरेको व्यापारको तथ्यांक नेपाल सरकारसँग बक्स अफिस प्रणाली मार्फत प्राप्त हुने गर्छ । विसं २०७६ देखि नेपालमा लागू गरिएको यो प्रणाली शुरू नहुँदा निर्माता वितरककै तथ्यांकमा भर परिरहेका थिए । चलचित्रको वास्तविक कमाइको विवरण देखाउने प्रणालीमार्फत कुन चलचित्र भवनमा कति टिकट बिक्री भयो भन्ने आधिकारिक तथ्यांक निर्माता तथा वितरकले थाहा पाउँछन् ।

यो प्रणाली जडान भएको तीन वर्ष पूरा भइसक्दा पनि यसको विश्वसनीयतामा प्रश्न उठ्ने गरेको छ । बोर्डले २०७९ सालमा प्रदर्शन भएको १३५ मध्ये १३२ चलचित्रको कूल व्यापार सार्वजनिक गरेपछि प्रदर्शनरत चलचित्र ‘छक्का पञ्जा ४’ को सार्वजनिक भएको विवरणलाई लिएर निर्माण समूहले आपत्ति जनाएको छ ।

गत फागुन १९ देखि प्रदर्शनरत चलचित्र ‘छक्का पञ्जा ४’ ले बोर्डको विवरणअनुसार ६ लाख ८ हजार ४०२ टिकेट विक्री भएवापत १६ करोड ९४ लाख ३४ हजार ६३४ रुपैयाँ कूल व्यापार गरेको छ ।

प्रदर्शनरत भएकाले यसको व्यापार अझै बढ्ने देखिन्छ । चलचित्रका लेखक, निर्मातासँगै कलाकारसमेत रहेका दीपकराज गिरीले सामाजिक सञ्जालमार्फत नै सार्वजनिक भएको विवरण ठीक नभएको प्रतिक्रिया दिएका थिए । चलचित्रका अर्का निर्माता निर्मल शर्माले पनि बोर्डको सार्वजनिक विवरण कम देखिएको जानकारी दिए । ‘हामी छलफल गरेर यसबारे जानकारी दिने तयारीमा छौँ । यद्यपि बोर्डले सार्वजनिक गरेको विवरणमा निकै फरक परेको छ । यसबारे आधिकारिक धारणा नै सार्वजनिक गर्छौँ’, निर्माता शर्माले भने ।

बोर्डले सार्वजनिक गरेको तथ्याङ्कमा सामान्य फरक भने पर्न सक्ने बक्स अफिस अधिकृत प्रवीण पाण्डेले जानकारी दिए । ‘सबै चलचित्र भवनमा बक्स अफिस प्रणाली जडान भए पनि अनुगमनको अभावमा केही फरक हुनसक्छ । केहीले नियतबस पनि गरिरहेका हुन्छन् । तर बोर्डले यसमा अनुमगन बढाएको छ’, अधिकृत पाण्डेले भने, ‘हामीसँग रहेको आधिकारिक तथ्यांक सार्वजनिक गरेका हौँ ।’

यसैबीच बोर्डका अध्यक्ष भुवन केसीले व्यापारबारे फैलिने भ्रम हटाउन वैशाखदेखि मासिक रुपमा बक्स अफिस विवरण सार्वजनिक गर्ने जानकारी दिए । ‘सञ्चार तथा सूचना प्रविधि मन्त्रालयबाटै निर्देशन भएपछि वार्षिक विवरण बाहिर ल्याएका हौँ । अब मासिक रुपमा ल्याउने छौँ’,अध्यक्ष केसीले भने । मासिक रूपमै विवरण सार्वजनिक हुँदा व्यापारलाई लिएर भ्रम सिर्जना नहुने उनको विश्वास छ । (रासस)