गाडी दुर्घटनामा परी सर्केगाड गाउँपालिका उपाध्यक्ष कार्कीको मृत्यु

सुर्खेत । सवारी दुर्घटनामा परी घाइते भएका हुम्लाको सर्केगाड गाउँपालिकाका उपाध्यक्ष चन्द्रसिंह कार्कीको उपचारका क्रममा मृत्यु भएको छ ।

सोमबार सुर्खेतबाट नेपालगन्ज जाँदै गरेको कर्णाली प्रदेश ०२००१ ख १०११ नम्बरको गाडी रत्नराजमार्ग अन्तर्गत सुर्खेतको भेरीगंगा नगरपालिका–५, एमाले मोडमा दुर्घटना हुँदा उपाध्यक्ष कार्की सख्त घाईते भएको जिल्ला प्रहरी कार्यालय सुर्खेतले जनाएको छ ।

कार्कीलाई दुर्घटना लगत्तै उपचारका लागि नेपालगन्ज मेडिकल कलेज अस्पतालमा लगिएको थियो । उनको उपचारका क्रममा करिब राति दुई बजे निधन भएको प्रहरीको भनाइ छ । उनी नेकपा माओवादी केन्द्रको तर्फबाट हुम्लाको सर्केगाड गाउँपालिकामा गएको निर्वाचनमा उपाध्यक्ष निर्वाचत भएका थिए ।