कालिकोट । कालिकोट प्रहरीले तिलाकर्णाली हाईड्रोपावरको ईन्जिनियर हुँ भन्दै ठगी गरेको आरोपमा एक जनालाई पक्राउ गरेको छ ।
प्रहरीले तिला हाईड्रो–१ र २ को नाम प्रयोग गरी सर्वसाधारणबाट पाँच लाख रुपैयाँ ठगी गरेको आरोपमा जुम्लाको चन्दननाथ नगरपालिका–१, आचार्यवाडाका ३५ वर्षीय कर्णवीर महतारालाई पक्राउ गरेको हो ।
उनलाई सदरमुकाममा मान्ममा ठगी गरिरहेको अवस्थामा नियन्त्रणमा लिइएको प्रहरीले जनाएको छ । उनीमाथि तिला हाइड्रोपावर– १ को कर्मचारी हुँ भन्दै सर्वसाधारणलाई विभिन्न प्रलोभन देखाएर ठगी गरेको आरोप छ ।
हाइड्रोपावरमा लगानी गर्ने तथा रोजगारी दिलाउनेलगायतका आश्वासन दिएर रकम लिएको बताइएको छ। प्रहरीका अनुसार ठगीमा पर्नेमा कालिकोटको शुभकालिका गाउँपालिकाका अनन्त चौलागाईं, स्थानीय शिक्षक रामबहादुर बोगटी, धनबहादुर बटला, रमेशबहादुर शाही र भीमबहादुर शाहीसहितका व्यक्ति छन् ।
प्रारम्भिक विवरणअनुसार पीडितहरूबाट पाँच लाख रुपैयाँ ठगी भएको जनाइएको छ । घटनाबारे प्रहरीले थप अनुसन्धान गरिरहेको बताएको छ ।
