लिङ्गे पिङसँगै कोहलपुरमा दसैँको रौनक

बाँके । दसैँको आगमनसँगै कोहलपुरमा लिङ्गे पिङले पुरानो परम्पराको झल्को दिँदै उत्साह थपेको छ। विगतका वर्षहरूमा अलि कम देखिएका लिङ्गे पिङहरू यस वर्ष भने कोहलपुरका चोक चोकमा सजिएका छन् । कोहलपुर बेटर बाँकेको आयोजनामा न्युरोडस्थित खुल्ला मैदानमा दुई वटा लिङ्गे पिङ राखिएका छन्, जसले स्थानीय बालबालिका, युवा, र वृद्धहरूलाई आकर्षित गरेको छ ।

कोहलपुरका स्थानीय राजु शर्माले विगतका दसैँमा पिङ नभएको हुँदा उत्सवको खालि महसुस हुने गरेको तर यसपटक चोक चोकमा लिङ्गे पिङ देख्दा मन नै हर्षित भएको बताए ।

लिङ्गे पिङसँग जोडिएको रमाइलो र उत्सवको माहौलले कोहलपुरका विभिन्न ठाउँमा दसैँको रौनक फैलिएको छ । विशेष गरी बाँके जिल्लाका कोहलपुर, बैजनाथ, र खजुराका चोकहरूमा लिङ्गे पिङ राखिएपछि बालबालिका र युवाहरूको भिडभाड देखिन्छ । दसैँको बिदामा मोबाइल र अनलाइन खेलहरूको लत छोडेर बालबालिकाहरू पिङमा रमाउन थालेको स्थानीयहरूले बताइरहेका छन् ।

पिङ र चङ्गाको संस्कार हराउँदै गए पनि अहिले युवा पुस्ताले यसलाई पुनः जागृत गराउन थालेका छन्  । दसैँको मौलिकता र परम्परागत खेलहरूसँग जोडिएर लिङ्गे पिङ जस्तै खेलहरूले युवाहरूलाई नजिक्याइरहेको छ । यसरी लिङ्गे पिङ न केवल मनोरञ्जनको साधन बनेको छ, तर संस्कृति र परम्पराको संरक्षणमा पनि महत्त्वपूर्ण भूमिका निर्वाह गर्दै छ ।

यो सन्देशले परम्परागत मूल्य र संस्कृति जोगाउनका लागि अझ धेरै स्थानीय संघ-संस्था र युवाहरूलाई प्रेरित गरेको छ । पिङमा रमाइरहेका बालबालिका र उनीहरूको हाँसोले दसैँको उत्सवलाई अझ भव्य बनाइरहेको छ ।