१२ टन सल्लाको आँख्ला नेपालगञ्जमा थन्कियो

नेपालगन्ज । सल्लाको आख्ला भारत निकासी नहुँदा जडीबुटी व्यवसायी समस्यामा परेका छन् ।

आँख्लाको निकासी कर शतप्रतिशत भएकाले २५ करोड बराबरको १२ टन सल्लाको आँख्ला गोदाममा थन्किएको नेपाल जडीबुटी व्यवसायी संघ नेपालगन्जका अध्यक्ष टङ्क शर्माले बताए ।

‘भन्सार निकासी छुट भए सल्लाको आँख्ला भारत निकासी हुन्छ, व्यवसायीले लगानी गरेर गोदाममा थन्क्याएका छन्,’ अध्यक्ष शर्मा भने, ‘सरकारसँग आग्रह गरे पनि यसको समाधान हुन नसकेको छैन् ।’

करिब ३० वर्ष पुरानो सल्लाको रुखबाट त्यस्तो आँख्ला निस्कने गरेको र त्यसलाई भारतमा श्रीखण्ड जस्तै महत्व दिने गरिएको उनको भनाइ छ । उनका अनुसार सो सल्लाको आँख्ला डोटी, डडेल्धुरा, बैतडीलगायत जिल्लाबाट नेपालगन्ज आउँछ ।

यसबाहेक जटामसी, अमला, खिरौला, दालचिनी पनि निकासी हुन सकेको छैन् । यी जडीबुटी भारतमा सूचीकृत नभएका कारण निकासी हुन नसकेको उनले बताए ।

‘नेपालमा जडीबुटीबाट प्रशस्त सम्भावना रहे पनि त्यसतर्फ ध्यान र चासो पुग्न सकेको छैन्,’ उनले भने, ‘नेपालका घरघरमा जडीबुटीको उत्पादन भइरहेको भएपनि, त्यसको व्यवसायीकरण हुन सकेको छैन् ।’