सुर्खेत । दशौं राष्ट्रिय खेलकुद प्रतियोगिताका लागि कर्णाली प्रदेश स्तरीय खेलाडी छनौट प्रतियोगिता आजदेखि सुर्खेतको वीरेन्द्रनगरमा सुरु भएको छ ।
यही मंसिर १६ देखि २८ गतेसम्म सञ्चालन हुने १० औं राष्ट्रिय खेलकुद प्रतियोगिताका लागि कर्णाली प्रदेश खेलकुद विकास परिषद्ले खेलाडी छनौट प्रतियोगिता आयोजना गरेको हो ।
प्रतियोगिताको उद्घाटन गर्दै कर्णाली प्रदेश खेलकुद विकास परिषद्का अध्यक्षसमेत रहेका सामाजिक विकासमन्त्री जितबहादुर मल्लले प्रदेश स्तरमा आयोजना हुने यस्ता प्रतियोगिताले नयाँ प्रतिभा उजागर गर्नुका साथै राष्ट्रिय तथा अन्तर्राष्ट्रिय स्तरमा सफलता हासिल गर्न सक्ने खेलाडी उत्पादनमा योगदान पुग्ने विश्वास व्यक्त गरे ।
उनले कर्णालीबाट राष्ट्रिय प्रतियोगितामा सहभागी हुने खेलाडी छनोट गर्ने यस प्रतियोगितालाई प्रदेशको खेलकुद विकास र प्रतिभा पहिचानको महत्वपूर्ण अवसरकारुपमा हेरिएको बताए । छनोटमा सहभागी खेलाडीहरुले उत्कृष्ट प्रदर्शन गर्दै राष्ट्रिय प्रतियोगितामा प्रदेशको गौरव बढाउने अपेक्षा गरिएको उनको भनाइ थियो ।
राष्ट्रिय खेलकुद प्रतियोगिताको पूर्वतयारीका लागि प्रदेशका विभिन्न जिल्लाबाट छनौट भएका खेलाडीलाई मेडल प्राप्तिको सुनिश्चित हुने गरी आफ्नो पर्फमेन्स देखाउन कर्णाली प्रदेश खेलकुद विकास परिषद्का उपाध्यक्ष प्रमोद हमालले आग्रह गरे । प्रदेश स्तरीय छनोट प्रतियोगिता २६ गतेदेखि असोज ३१ गतेसम्म सञ्चालन हुनेछ ।
छनौट प्रतियोगिता अन्तर्गत दैलेखमा कराँते र ह्यान्डबल, जाजरकोटमा खोखो, सल्यानमा टेबुलटेनिस, रुकुम पश्चिममा कबड्डी, हुम्लामा तेक्वान्दो, जुम्लामा महिला भलिबल तथा हक्की, मुगुमा कबड्डी र कालीकोटमा पुरुष भलिबलका साथै बाँकी खेलका खेलाडी सुर्खेतबाट छनोट गरिने कर्णाली प्रदेश खेलकुद परिषद्का सदस्य सचिव रविन्द्र चन्दले जानकारी दिए । छनोट भएका खेलाडीलाई १० कात्तिकदेखि बन्द प्रशिक्षणमा राखिने उनले बताए ।
